13.11.2019

Түркістанда Түркия инвестицияларының қатысуымен 15 жоба іске асады


ТҮРКІСТАН. ҚазАқпарат- 2020- 2021 жылдар аралығында Түркістан облысында түрік инвестицияларының қатысуымен 493,7 миллион АҚШ доллары көлемінде 15 инвестициялық жобаны жүзеге асыру және 5 мыңға жуық жұмыс орнын құру жоспарлануда. Бұл туралы Түркістан облысының әкімі Өмірзақ Шөкеев Түркия мемлекетінің 41 ең ірі холдингтерінің басшылары қатысқан кездесуде айтылды, деп хабарлайды ҚазАқпарат тілшісі.

Об этом сообщает http://a-boom.net

«Түркия мен Түркістанды ежелгі тарихи тамырлар мен рухани көзқарастар байланыстырады. Бүгінгі таңда Түркия — Түркістан облысының, жалпы Қазақстанның маңызды, стратегиялық және сенімді серіктесі. Осыған байланысты мен Түркістанды дамытудағы қазақ-түрік ынтымақтастығының маңыздылығын атап өткім келеді. Біздің қалада халықаралық әуежай мен басқа да маңызды нысандардың құрылысына дәл түрік компаниялары қатысуда», — деді Өмірзақ Естайұлы Ыстанбұлда өткен қазақ-түрік бизнес-форумында.




Түркістан облысынан барған делегацияны облыс әкімі Өмірзақ Шөкеев бастады. Форумда еліміздің инвестициялық мүмкіндіктері таныстырылып, энергетика, машина жасау, химия, тау-кен, металлургия және тоқыма өнеркәсібі, ауыл шаруашылығы, инфрақұрылым және қаржы салаларындағы ынтымақтастықты күшейту мәселелері талқыланды.

Түркістан қаласында бауырлас мемлекеттің қолдауымен халықаралық әуежайдан бөлек өнеркәсіптік жылыжай салу және дайын металл бұйымдарын шығару мен туризм бағытындағы колледж құру сияқты ірі жобалар қолға алынған.

Форум аясында Түркістан облысының әкімі түрік капиталының қатысуымен Шығыс базары, сауда орталығы мен қонақ үйлердің құрылысы, төмен вольтты кабельдер шығару бойынша 3 меморандумға қол қойды. Sembol Construction, Ta Group және KastroKablo компанияларымен қол қойылған меморандумдардың жалпы сомасы 200 миллион АҚШ долларын құрайды.




Сондай-ақ форумда G2B форматында түрік бизнесінің 30-дан астам кәсіпкерлерінің қатысуымен іскерлік кездесулер өтті. Түрік инвесторлары Түркістан облысының туристік және өнеркәсіптік салаларына инвестиция салуға ниет білдіріп отыр.

Ынтымақтастықты күшейту және әрі қарай жалғастыру мақсатында түрік компанияларының Түркістан облысына сапары күтілуде. Түрік компанияларының Қазақстандағы инвестициялық жобаларға деген қызығушылығының өсіп келе жатқанын атап өткен жөн. Мәселен, 2019 жылы Қазақстанда түрік инвесторларының қатысуымен жалпы құны 2,9 млрд долларды құрайтын 18 жоба іске қосылған.

Еске салсақ, Ыстанбұл қаласында ҚР Премьер-Министрі Асқар Маминнің, Түркия Республикасының вице-президенті Фуат Октайдың, ұлттық компаниялар, даму қорлары мен сауда палаталарының басшылары, жоғарғы билік өкілдері және екі ел кәсіпкерлерінің қатысуымен қазақ-түрік бизнес-форумы өткен болатын.





Источник: “http://lenta.inform.kz/kz/turkistanda-turkiya-investiciyalarynyn-katysuymen-15-zhoba-iske-asady_a3584986”

Scroll to Top